Kristján Þórður Snæbjarnarson, formaður Rafiðnaðarsambands Íslands, hefur tekið við embætti forseta Alþýðusambands Íslands (ASÍ). Embættinu mun hann gegna fram að þingi ASÍ sem fram fer í októbermánuði. Þetta kemur fram á vef ASÍ.

Kristján Þórður tekur við embætti forseta af Drífu Snædal sem sagði af sér á miðvikudag. Kristján Þórður var sjálfkjörinn 2. varaforseti á 43. þingi ASÍ haustið 2018 og varð 1. varaforseti Alþýðusambandsins við afsögn Vilhjálms Birgissonar, núverandi formanns Starfsgreinasambands Íslands, í aprílmánuði 2020. Kristján var sjálfkjörinn 1. varaforseti á þingi ASÍ í október 2020.

Kristján Þórður hefur verið formaður Rafiðnaðarsambands Íslands frá 2011. Árið 2008 var hann kjörinn formaður Félags rafeindavirkja.